Í dag borga allir með plasti

Blessuð tombólubörnin þurfa að koma sér upp posum. 

Annars var ég að heyra í fréttum að settur saksóknari í Baugsmálinu hefði kallað kröfuna um skýrleika refsiheimilda, tískubólu. Vill einhver senda áfallateymi heim til Róberts Spanó. 

Og ég er orðin möppudýr og skrifstofublók. Persónuvernd er skemmtilegur vinnustaður.  

Fer með tímabundna ritstjórn á Vefritinu ásamt Þóri yfir sumarmánuðina. Þar er að birtast eðalstöff; daglegir pistlar og  svo helgarumfjallanir. Sjálf skrifaði ég um daginn um reynslu mína af módelstörfum. Ingvi Snær (vinnu)félagi hefur átt betra gengi að fagna í þeim geira, eða eins og hann kýs að orða það sjálfur: "Ég hef náð að sameina bransann og lögfræðina."

Flokk jú.  

 

Tvöfalt ekkifall... og þó

Ég er með bloggblokk.

Og margt búið að gerast síðan síðast. Stjórnin féll tæknilega séð ekki, sbr færslurnar hér að neðan. Og ég féll ekki. Ekkert tæknilegt við það. Bara  fimm daga geðveiki yfir kosningahelgina þar sem eins og þrjú próf / fjórtán einingar komu við sögu. Eignaréttareinkunnina (7,5 einingar í 100% prófi takk) vil ég tileinka Önnu Þóru og Magnúsi sem fóstruðu mig í tveggja vikna upplestrarútlegð á Akureyri. Og þeim sem stuðluðu að því að fráfarandi stjórn fengi hvíld jafnvel þótt R-listastjórn hafi ekki gengið upp. Það hefði að sjálfsögðu verið út úr kortinu að halda áfram ríkisstjórnarsamstarfi FD.

Skrýtið að hafa ekki skriðið beint af próflokadjamminu og inn á Mogga, eins og undanfarin ár. Í staðinn hef ég gert margt (af viti), aðallega sem galeiðuþræll. Svo sem í lagi að djamma aðeins þegar tími gefst til. 

Og skrifa helgarumfjöllun á Vefritið.

Úff

Ég trúi þessu ekki. Og í fréttum er bara Geir að dásama stjórnarsamstarfið og eitthvað kunnuglegt um Jón og að skorast ekki undan ábyrgð. 

Það eina jákvæða sem ég sé var þetta komment í nótt með að útlitið væri jafn bjart hjá mér og stjórninni varðandi fall. Og svo er margt flott/skemmtilegt/sterkt fólk að koma nýtt inn á þing fyrir flesta flokka. 

Helvítis partýlið

Veit fólk ekki að ég er í prófum?

VÚHÚ

Stjórnin fallin, fallin, fallin! Af einhverjum ástæðum er ég samt ekki á kosningavöku: Nú þarf ég að reyna að halda áfram að lesa kröfurétt því annars er ég fallin, fallin fallin. Á þessari stundu er útlitið svona ca jafn bjart hjá mér og ríkisstjórninni. En við gefum ekki upp vonina.

Ég held að það sé einboðið að endurskoða dagsetningu kjördagsins. Það er hellingur af fólki í prófum á þessum tíma, bæði í háskóla og menntaskóla. Við viljum líka fá að vera með.

Kjördagur

Eru ekki bara allir að fara að fella ríkisstjórnina?

Þá dettur mér í hug staka

Var að rifja upp þessa vísu sem varð til við skemmtilega absúrd aðstæður. Við Barbara úti á stöðuvatni í árabát. In the middle of nowhere, Japan. Ekki hræðu að sjá í umhverfinu nema eitt stk stórt sjóræningjaskip sem er eins og klippt út úr Pétri Pan og svo hjólabátur í svanslíki þar sem tvær öflugar japanskar stelpur hjóla sem mest þær mega til að verða á undan okkur í land. Október. En jólaskraut í öllum búðum. Ég frekar nýbúin að detta illa á hausinn og einhver áhöld um hvort það hefði áhrif á áttaskyn og fleira hjá mér. 

Á myndunum er annars vegar ég í skáldamóð með sjóræningjaskipið í bakgrunni og hins vegar hjólandi japönsku vitleysingarnir okkar. 

 

Í Japan koma bráðum jól

ég er úti á vatni

Vona á hoppi um heimsins ból

að hausinn á mér batni 

 

"Don´t stop me now, I´m having such a good time..."

Nei, þetta á ekki við um próflesturinn ef einhver hélt það.

Sá auglýsingu áðan í kringum fréttirnar þar sem þessi klassíski Queen slagari var leikinn undir. Allir hressir. Ég var allan tímann að bíða eftir að síðasti maðurinn sem yrði sýndur væri Geir Haarde og undir herlegheitin myndi kvitta Sjálfstæðisflokkurinn í tilefni kosninga. 

En nei.  N1 var það. Hitt hefði verið miklu fyndnara.

Það eru að koma próf

Ég held að þetta blogg ætli að hafa tiltölulega hægt um sig á næstunni.

Ljóð í kröfurétti og flugumenn

Það er gott að geta lífgað upp á lesturinn -eða bara daginn- með einföldum leiðum.

Ljóð dagsins á ljóð.is er ein. Erla Elíasar á flott innlegg í dag. Ég var aðeins að velta fyrir mér túlkun á því áður en ég hélt áfram að lesa um skaðabótareglur fasteignakaupalaganna. Þess má geta að Erla hefur líka skrifað mjög skemmtilega pistla á Vefritið.

Og Eva átti þar góða pælingu um daginn, um afstæði frelsishugtaksins.

 

Annars hefur mér tekist að koma tveimur nánum flugumönnum* í minn stað á Mogganum í sumar. Geri aðrir betur, miðað við hversu margir þreyttu blaðamannaprófið. Ég er stolt af ykkur og ekki síður ánægð fyrir hönd Mogga míns. 

 

 

* Þeim er ekki ætlað að vinna blaðinu mein á nokkurn hátt en eru flugumenn í þeim skilningi að leka í mig upplýsingum um partý og annað mikilvægt.