Að snúa seinheppninni sér í hag

Ég skilaði skattmanni skýrslu áðan, og það alveg einum degi fyrir síðasta frest. Fyrirmyndarborgari. 

Venjulega er þetta bara örlítil handavinna. En nú fylgdu heilabrot. Hvernig átti að færa inn 200 kallinn sem ég vann í Meistaranum á síðasta ári. Átti ég að "gleyma" honum gegn betri samvisku? Neeei.  

Heyrði í einhverjum valinkunnum fjölskyldumeðlimum sem ekki höfðu svar á reiðum höndum (e. angry hands) svo ég ákvað á endanum að hringja í sjálfan skattmann, sem hefur sett upp hjálparlínu af þessu tilefni. Og það leið og beið í símanum. "Vinsamlegast bíðið..." 

Eftir smástund var ég farin að þurfa að pissa. "Nei andskotinn, ég get ekki farið á klósettið með símann í annarri. Týpískt að það svari akkúrat." En svo fór ég að hugsa: Var það ekki einmitt aðalmálið að mér yrði einhvern tímann svarað? Svo ég bara fór á klósettið. Og þetta gekk eftir. 

 

Í fréttum er þetta helst

-Fréttavaktavika á Mogganum

-Mánuður og tveir dagar í fyrsta próf

-Kvíði

-Ný sambúð

Krútt-Gunnar

Ég var á tímabili þess heiðurs aðnjótandi að sitja í stjórn með Gunnari I. Birgissyni. Ég í minnihluta, hann í meirihluta. Þess vegna fannst mér þetta alveg extra fyndið. Ég hló eiginlega allan síðasta laugardag. "Enda ávallt svolítið krúttlegur þegar hann situr eins og snúið roð í hundi þegar við höfum aðra skoðun á málum."

Þetta tengdi ég vel við. Gunnar er ekki týpan sem er á heimsfriðarmataræði. Við sátum eitt sinn á stjórnarfundi hjá LÍN og vorum að ræða erfitt mál eins lánþegans. Mér var nokkuð niðri fyrir vegna fyrirsjáanlegs óréttlætis sem mér fannst sjóðurinn ætla að beita viðkomandi, veifaði stjórnsýslulögunum og þrumaði um rannsóknarreglu stjórnsýsluréttarins.

Kristín Edwald, lögfróði maður meirihlutans var fjarri góðu gamni svo ég óð uppi án þess að nokkur fengi efnislega rönd við reist. Svo Gunnar greip til þess klassíska trikks að drulluspóla yfir andstæðinginn frekar en deiluefnið. Hvaða andskotans lögfræði vorum við eiginlega að læra þarna niðri í HÍ? Var þetta lögfræði Hammúrabís eða hvað? Er ennþá að velta fyrir mér þessu seinna.   

Gunnar eldar grátt silfur við Samfylkinguna víðar en í Kópavogi. Þegar hann mætti of seint á fundi í Borgartúninu var það alltaf R-listanum að kenna. Skipulagsmálin sjáiði.

En þrátt fyrir að tekist hafi verið á með mis málefnalegum hætti, verður að halda því til haga að við gerðum frábæra samninga þetta árið. Og það er ekki annað hægt en þykja svolítið vænt um Gunnar. Hann er kannski með horn en ég held að það sé ekkert rosalega djúpt á þeim.

Nýr Afríkufrændi

Lítill bróðursonur er fæddur í Addis Ababa, Eþíópíu. Velkominn í heiminn Davíð Ómar. Ég vona að ég fái að kynnast þér sem fyrst. 

Elsku Kristján og Helga, Margrét Helga, Jóel og Dagbjartur Elí: Til hamingju. Ykkar er að sjálfsögðu sárt saknað héðan af klakanum. En það er víst hægt að vera hamingjusamur og gera góða hluti víðar en hér.

Ég verð að fá að deila myndum af fallegu bróðurbörnum mínum og mágkonu.

Skemmtileg kenning

Ef það ríkti í alvöru jafnrétti á Íslandi, þá væri Inga Jóna Þórðardóttir forsætisráðherra. 

Takið skoðanakönnun um fiskveiðiauðlindaákvæðið!

Var að setja hana inn og er forvitin að vita hvað ykkur finnst. 

E.s. Það má endilega gera grein fyrir atkvæði sínu hér í kommentakerfinu.  

Auðlindaákvæðið: Tímafrek og tilgangslaus yfirbreiðsla

Afsakið hlé. Nú vil ég ekki gefa mig út fyrir að kokgleypa endilega allt sem kennt er  við lagadeild Íslands. En ég semsagt vil lýsa yfir samstöðu minni með þeim háu herrum lagadeildar sem nú reyna að koma landanum í skilning um að fyrirhugað fiskveiðiauðlindaákvæði í stjórnarskrá sé popúlismi af verstu gerð. 

Þetta ákvæði hefði enga þýðingu. Það yrði aldrei hægt að beita því.

Þetta vita lögfræðingar sem hugsanlega er ástæðan fyrir að ég man ekki eftir að hafa heyrt neinn stjórnmálamann sem líka er lögfræðingur, tjá sig um málið. Nema Sigga Kára sem leyfir sér að vera með efasemdir.

En efasemdaraddirnar fá að drukkna í innblásnum orðaflaumi allra þeirra sem ætla að láta kjósa sig í vor. Það gildir ekki síður um stjórnarandstöðuna en Framsókn sem ætlar að fleyta sér áfram á þessu og Sjálfstæðisflokk sem þorir ekki að vera vondi kallinn. Geir tekur samt fram að þetta hafi ekki áhrif á kvótakerfið. Ég held að stjórnarflokkarnir ættu að hugsa sinn gang og hætta þessum tilraunum til að breiða yfir að þeim hafi tekist illa upp við að innleiða kvótakerfi. Nær væri að beina kröftunum að því að skoða hvað má laga þar ef fólk hefur á annað borð áhuga á málinu.

Fyrir þá sem vilja kynna sér af hverju þetta ákvæði væri einskis vert, bendi ég á pistil Skúla Magnússonar í Fréttablaðinu í dag. Ég er ekki endilega sammála því alla leið sem hann segir um að "skreyta stjórnarskrár með ýmsum lagalega merkingarlausum stefnuyfirlýsingum." Hins vegar hittir hann naglann á höfuðið hér: "Það keyrir um þverbak þegar setja á í stjórnarskrá ákvæði sem enginn veit hvað þýðir!"

--

Stjórnmálamönnum bendi ég svo á að ýmis mál bíða afgreiðslu og þurfa athygli. Má nefna frumvarp til breytinga á kynferðisbrotakafla hegningarlaganna og nýja jafnréttismálafrumvarpið. Ef færi gefst á væri jafnvel hægt að ræða kjör aldraðra. Nei ég segi nú bara svona. 

Eyjamenn lýsa efasemdum um auðlindaákvæði í stjórnarskrá

AP: Persónuverndari

Þá er einn kall horfinn aftur á vit lögfræðinga og krókódíla í Miami. Það var skutlað á flugvöllinn áðan. "Þetta styrkir hjá ykkur ástina," er viðkvæðið hjá elskulegu fólki sem lítur á björtu hliðarnar. Bullshit. Fjarbúð er ömurleg.

Ef eitthvað bjátar á í sambandinu, hvað á maður þá að gera? Taka næstu flugvél til NY og tengiflug til Flórída? Grenja við fartölvuna og þykjast ræða málin af alvöru á skype? Ekki reyna að segja mér að þetta sé sniðugt.

--

Annars verða þáttaskil hjá mér í sumar. Eftir fimm ára starf á Mogganum með skóla, fer ég annað þetta árið. Fékk tilboð frá Persónuvernd sem mér fannst ég ekki geta hafnað og verð þar við bókarskrif og fleira frá og með fyrsta júní. Ég hlakka mjög til enda viðfangsefnin spennandi og vinnustaðurinn almennt óvenju góður að ég held.

Moggaskilnaði fylgir að sjálfsögðu fyrirfram tregi. Jafnvel þótt ég geti, eins og gefur að skilja, frussað út úr mér einstaka kaffibolla við lestur á forystugreinum og haft einhverjar athugasemdir við jafnréttismál og annað í stjórnun blaðsins. Þá skiptir það fyrir mig persónulega miklu minna máli en allt sem ég hef lært og allt það frábæra fólk sem ég hef unnið þar með, kynnst og eignast að vinum. 

Einhvern veginn finnst mér reyndar ólíklegt að ég hafi að fullu sagt skilið við blaðamennsku frá og með júní. Ég elska þetta starf.  

Valið milli vinstriflokka

Gömlu félagarnir mínir í VG hafa greinilega átt góða helgi. Til hamingju með það kæru vinir. Augljóslega hefur munað mikið um að ég skráði mig úr flokknum fyrir um ári, því leiðin hefur legið beint upp á við hjá þeim síðan. Að vísu skráði ég mig aftur í smátíma þar sem mér fannst ég eiga nógu mikið í flokknum til að fá að kjósa í forvali.

Nú er ég óflokksbundin, íhugandi og fréttaskrifandi í bili (og hvort sem er ekki viljað taka beinan og virkan þátt í flokksstarfi meðan ég hef verið í fréttaskrifum). Traustustu heimildamenn hafa talið mig gengna til liðs við Samfylkinguna. Það er rétt að ég hef daðrað við það. Hins vegar hef ég ekki tekið skrefið ennþá og verið eitthvað hikandi. Get ekki sett puttann á nákvæmlega af hverju. Tilfinningar (Tilfinningar! segi það og skrifa. er í lagi heima?..) kannski átt einhvern þátt. Erfitt að slíta sig frá einum flokki og hefja starf með öðrum. Sérstaklega þegar maður vill eiginlega helst af öllu eiga eitthvað í báðum flokkum. Vinna með góðu fólki úr báðum.

Sama hvað öllum mótrökum líður, og þau þekki ég ágætlega, hefði ég a.mk. viljað sjá tilraun gerða til að vinna saman í einu framboði. Í menntó hugsaði ég sem svo að það hefði nú einu sinni farið þannig að það var ekki gert. Maður þyrfti þá bara að velja á milli þess sem var orðið til. En ég held að það sé fjöldi fólks sem finnst þetta val á milli erfitt og jafnvel óþarft. Betra að sameina kraftana. Ég vil ekki gefast upp í þeirri viðleitni. Ágætis byrjun væri ríkisstjórnarsamstarf frá og með maí. 

---

Ég átti helgarumfjöllun á Vefritinu og ákvað að fjalla um klám. Skoðaði klámsíður o.fl. í þeim tilgangi. Þetta var alveg ferlega erfitt og mér eiginlega búið að líða hundilla því ég var að skoða og lesa um dapurlegri hluti en ég hefði átt von á. Fyrir var ekki alveg bætandi á jafnvægisleysið hjá mér. En afraksturinn birtist s.s. á Vefritinu og er þar m.a. birt athugasemd klámsíðuhaldara um "sögu dæmigerðrar klámhóru."

---

Til hamingju með útskriftina Bjarni Már. Eins og þú hefur verið óþreytandi við að segja mér: Þú ert flottastur. Kallinn s.s. heima í nokkra daga til að útskrifast sem MA í alþjóðasamskiptum. Telur sig verða orðinn Grandmaster þegar hann klárar mastersnámið í Miami. 

Yfirborðskennt þjóðmálablogg

Hvað er þetta með Guðna Ágústsson og að bera brigður á kannanir þar sem niðurstöðurnar henta honum ekki? Fyrst er Fréttablaðið vafasamt af því Framsókn kemur verst út í þeirra könnun. Svo mætir hann í Kastljósið í gær og eyðir öllu sínu púðri í að spyrja út í hvernig könnun á matarverði hafi verið unnin. Allt til að sleppa við að ræða matarverð á Íslandi. 

Ég er annars orðin mjög spennt að sjá hvernig matarverðsaðgerðir koma út þegar þær taka gildi núna 1. mars. Ef verðið lækkar, er það vel og má hrósa stjórnvöldum fyrir það auk stjórnarandstöðunnar sem hefur átt frumkvæði í málinu. Hins vegar má enn gera betur án þess að við förum nánar út í það mál. Ég nenni því ekki núna. 

---

Bendi svo á þetta ofsalega áhugaverða málþing sem er á morgun. Reikna reyndar sjálf ekki með að komast en treysti þá á aðra að segja mér undan og ofan af þessu. Fyrir þinginu stendur Alþjóðamálastofnun, hverrar forstöðumaður er Silja Bára Ómarsdóttir. Þess má geta að Silja Bára er flottust. 

23. febrúar kl. 13:30-15:30 í Odda 101
Er stjórnarskráin úrelt?
Málþing um stjórnarskrárbreytingar og alþjóðavæðingu.

Kalla alþjóðaskuldbindingar á stjórnarskrárbreytingar?
- Björg Thorarensen, prófessor í stjórnskipunarrétti við lagadeild Háskóla Íslands

Stjórnarskráin og þátttaka Íslands í samvinnu Evrópuríkja
- Davíð Þór Björgvinsson, dómari við Mannréttindadómstól Evrópu:

Þátttaka í alþjóðasamtökum og endurskoðun stjórnarskrárinnar
- Þorsteinn Pálsson, ritstjóri og varaformaður Stjórnarskrárnefndar.

Stjórnarskrárfesta þolir ekki bið
- Kristrún Heimisdóttir, lögfræðingur  

---

Nú þarf ég að fara og skoða klámsíður vegna fyrirhugaðrar helgarumfjöllunar á Vefritinu.