Maður dagsins

er tvímælalaust Bjarni Már sem skrifaði þennan stórskemmtilega, ömurlega gestapistil fyrir okkur á Vefritið.

--- 

Hvernig getur manni dottið í hug að slöngva ipod heyrnartólunum ofan í vatnsglasið sitt og taka ekki eftir því fyrr en hálftíma seinna.

Vörutorgið með helstu nauðsynjar á hreinu

Fór að slökkva á sjónvarpinu um daginn og heyrði eina setningu úr Vörutorginu. „... Og þá geturðu búið til kandífloss í mörgum mismunandi litum!”

Vörutorgið. Greinilega allt sem þarf. 

Enskuslettur

Ég sletti ensku að ég held talsvert. Það er miður.

Þá er ég ekki bara að tala um dísesið frá því í gamla daga. Oft virðast flókin orð og hugtök verða fyrst til að rata fram á tungubroddinn á ensku. Þegar konan er farin að nota orðskrípi á borð við "refíneraður," þarf að gera eitthvað í málunum.

Það er nefnilega alls ekki töff að sletta ensku mikið. Stundum kann manni að finnast það fínt. En hugsið ykkur Þjóðverja að tala þýsku eða Japana að tala japönsku: "Jaja ich heiße Klaus, aber OH MY GOD, können wir das nicht..." / "Konnichiwa, genki desuka?! Nihon-jin desuka? YEAH RIGHT!"

Þegar ég fer til útlanda finnst mér yfirleitt megahallærislegt að heyra tungumál heimamanna talað með áberandi enskuslettum. Ég vil helst ekki svoleiðis mengun í menningunni sem ég er að kynnast. Og fæ aulahroll. 

Ætli sama eigi við um túrista sem koma til Íslands?

 

 

Í sól og sumaryl

Í kvöld er ég í grundvallaratriðum rauð að framan og hvít að aftan. Það var nefnilega sólarfrí í vinnunni seinnihluta dags, fyrir þá fáu sem ekki voru erlendis eða í fríi. Forstjórasnillingurinn stóð vaktina ein það sem eftir var svo ekki þyrfti að loka sjoppunni. 

Húrra fyrir henni. Ég verð tvöfalt duglegri í næstu viku í staðinn.  

ALLIR AÐ MUNA AÐ NOTA SÓLINA. ÞÁ VERÐUM VIÐ GLÖÐ. 

 

E.s. Bjarni Flórídamaður varð fyrir verulegu aðkasti með trefil í bænum í dag. Hann tuðar um að veðrið sé vont og Ísland dýrt. Svo fór hann í sleik við ókunnuga konu á Austurvelli. Dagný veit meira um málið.  

E.e.s. Bjarni er óhress með að ég sé að ljúga upp á hann á bloggsíðum úti í bæ. Hann fór alls ekkert í sleik.

Bannað að príla milli hólfa!

Ég er lasinn aumingi.

Í fyrrakvöld hélt ég að málið væri ofnæmi. Ákvað að standa við stóru orðin og skella mér á völlinn.  Og það var alveg subbulega gaman. Subbulega segi ég af því horið flæddi úr nefinu á mér. En það er augljóst af hverju var gaman. Sex þúsund manns og fimm núll.

Dró familíuna með og uppgötvaði að ég hef varla setið aftur í hjá mömmu og pabba í mörg ár. Sindri bró var að vísu á Moggavakt og "lýsti leiknum" beint á mbl.is. Litla greyið. 

"Þegar þið loksins mætið á völlinn látiði gefa ykkur miða og sitjið í forsetastúkunni," sagði pabbi við okkur mömmu eftir leikinn. Í miðaröðinni gaf maður frá vissu fyrirtæki okkur miða. Svo komum við upp í stúkuna 0,5 sekúndum eftir fyrsta markið. Frábært. En þá voru góð ráð dýr með sæti því strax þarna var orðið vel fullt. Pabbi deyr ekki ráðalaus og smellir sér yfir eins og eina girðingu milli hólfa til að komast í fullt af lausum sætum. Við klifruðum bara öll yfir. 

Fyrir framan okkur sátu Eyjólfur Sverrisson og frú og að ég held aðstoðarþjálfarinn. Held að konan hans Eyjólfs heiti líka Anna Pála. En töff nafn. Þorði samt ekki að athuga það. Ef einhvern tímann á leiknum var tekin mynd af Eyjólfi (Myndatexti: Landsliðsþjálfari karla tekur glósur - grín, frekar ódýrt) hefur það væntanlega verið þegar ég var að þurrka hor fyrir aftan. 

Svo voru verðir farnir að rölta um og stöðva krakka í að klifra inn í sama hólf og við höfðum gert. Pabbi vakti athygli mína á að við sætum víst í bólstruðu stólunum. Eftir hlé glumdi í hátalarakerfinu "Áhorfendur eru minntir á að stranglega bannað er að príla milli hólfa." Ekki laust við að ég færi að horfa vænisýkislega í kringum mig. Á leiðinni niður úr stúkunni nikkaði Gamli góði Villi pabba og sagði eitthvað um að þær hefðu verið flottar stelpurnar. Pabbi bara "já, ég er líka frægur."

Svo var farið til baka í bílinn. Honum hafði verið lagt snyrtilega í miðri grasbrekku: "Hér komum við á jeppanum okkar.. Farið frá, öhh, hinir jeppar!" Jeppar eru ofnotað og stórhættulegt prjál á götum Reykjavíkur. Hvað um það. Bannað að ganga á grasinu er yfirleitt reglan á svona grasbölum. Yfirleitt stendur ekkert um að keyra. Og til öryggis tókum við mamma hlaupandi útgáfuna af Göngulagsmálaráðuneytinu á leið í bílinn. Við hliðina á okkur í grasinu hafði verið lagt jeppa með einkanúmerinu "JURTIR." Það fannst okkur mjög fyndið. Góður felubúningur. 

Ég læt öðrum eftir að skrifa af viti um leikinn. En stelpurnar "okkar," fyrst þeim gengur svona vel núna, voru greinilega miklu teknískari og áttu flottari sendingar og gabbhreyfingar, þótt þær serbnesku hafi barist af krafti. Við virðumst eiga margar efnilegar stelpur auk þessara sem hafa haldið liðinu uppi undanfarin ár. Ásthildur Helgadóttir kannski ekki fram úr hófi snörp en alltaf traust. Svo er hún líka sæt. Grín. Mér finnst Ásthildur ofboðslega sæt. En við eigum ekki að hlutgera íþróttamenn. 

 

E.s. Bæti hér við link á eina brjálæðislega flotta helgarumfjöllun hjá mér.  Þótt ég segi sjálf frá og allt það. Nennti ekki að búa til sér færslu um þessi stórtíðindi.

 

 

Góður dagur

Vúhú kosningaréttur. Vúhú jafnrétti. Áfram stelpur. Gleðilegan 19. júní!

Ég var miklu skemmtilegri á þessum degi í fyrra en ég er núna og vitna því í sjálfa mig 2006 og hana Sögu, sem er skemmtileg að vanda árið 2007.

 

Snúum okkur bara að kvennalandsliðinu

Augljóslega eigum við  bara að hætta að svekkja okkur á þessu karlalandsliði og snúa okkur að stelpunum. Rosalega er ég ánægð með þær. Áfram Ísland! Djöfull, af hverju fór ég ekki á leikinn. 

Á þriðjudaginn verða síðan allir jafnréttissinnar í einhverju bleiku! Ég hlakka mjög til.

 

Rauðhærður strákur?

Mig dreymdi margt í nótt. Eitt var að ég ætti barn. Skemmtilegt í ljósi umræðna um getnaðarvarnir í nótt. En líklega er þetta af því ég er nýbúin að halda á nýja frændanum Davíð Ómari sem er mættur frá Eþíópíu. 

Af hverju ætti ég að eiga rauðhærðan strák? Á það að þýða eitthvað?

Annars get ég upplýst að barneignir eru alls ekki á dagskrá í náinni framtíð. Þrátt fyrir spár stelpnanna um að ég verði fyrst í hópnum. Líklegust til að gleyma pillunni sjáiði.

--

Vefritspartý var gott grín. Skemmtilegt fólk og krúttkynslóðartónlist. Fyrir áhugasama um ... mannfjöldatölur drekka Veffar greinilega fremur bjór í flösku en dós. Kaldi er fínn bjór.  

 

Ryksugan á fullu, étur alla drullu

Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa Það er gaman að þrífa

Vefritspartý annað kvöld. Stefnir í mikla gleði. Best að fara að byrja í alvöru á að taka til.

Af hverju fæ ég ekki nógu góða tilfinningu...

Þegar Bandaríkjamenn lýsa því yfir að Ísland verði góður samstarfsaðili í Öryggisráði Sameinuðu þjóðanna?