Hahaha

Mögnuð auglýsing fyrir snyrtivöruframleiðandann Biotherm í sunnudagsblaði Moggans. Guðni Einarsson, sem augljóslega fylgist vel með því nýjasta í snyrtivörum, var að benda mér á þetta. Um er að ræða heilsíðuauglýsingu undir fyrirsögninni SÝNDU MAGANN - ÞAÐ ER FRÁBÆRT.

"Prófaðu CELLULI-CHOC fyrir aðra hluta líkamans, en gelið vinnur gegn appelsínuhúð. Það gerir átakið að hreinni ánægju sem þú nýtur á hverjum morgni, fullkomlega árangurslaust. Sérlega ferskt, silkikennt gel með sítruskeimi: Það er hreinlega girnilegt að grenna sig!"

"Get ekki hætt..."

Þetta er aðeins of fyndið til að deila því ekki og nógu langt um liðið.  Sagan hefst á nýárskvöldi árið 2006. Hópur af hressum stúlkum ákveður með engum fyrirvara að fagna nýju ári -aftur- með því að blása til teiti. Gestir þurftu að vera klæddir í kjóla, gott ef ekki vera róttækir og drykkfelldir líka.

Í partýinu voru blandaðir kokkteilar af ýmsum gerðum og hlustað á tónlist tíunda áratugarins. Að lokum fór hópurinn í bæinn í stórum leigubíl og allir settu á sig sama eldrauða varalitinn á leiðinni. Augljóslega voru ekki allir jafn harðir af sér í djamminu og þessar stelpur því talsvert þurfti að leggja á sig til að finna opinn bar og fólk í stuði. Eftir gott "single-handed" tjútt á Kaffibarnum og hinum ofurkúl stað Óliver var ákveðið að gera eitthvað sér til dægrastyttingar. Um nokkurn tíma hafði það verið mikið trend hjá aðalsöguhetjunni að taka gsm síma fólks traustataki á djamminu og senda random sms í random símanúmer. Þetta hafði leitt af sér ýmislegt skemmtilegt, sbr. skilaboðin "Viltu sofa hjá mér. Gerðu það," sem lentu á mis óheppilegum stöðum. 

Nú. Slík var stemmningin á þessu kvöldi að þar sem stúlknagerið sat á annarri hæð Óliver var ákveðið að leika þennan hressa leik. Símum var skellt á borðið, hver og ein tók einhvern síma af handahófi og notaði hann til fyrrgreindra hrekkjasendinga. Aðalsöguhetjan fékk símann hennar Söndru til umráða og sendi skilaboð á fyrrverandi kennara Söndru, djasshönkið Jóel Pálsson. Ekki er munað hvað stóð þar, getur einhver hjálpað til? En það var víst sérlega kvikindislegt enda ískraði hláturinn í  hetjunni okkar. 

Ýmislegt fleira gekk þarna á. Kristín Tómasdóttir "sendi" skilaboð á Frosta í Mínus, eitthvað á þá leið hvað hún væri heit. Fékk til baka "Hvar ertu?" Allir urðu illa úti -nema hetjan okkar. Sólrún er augljóslega svo hjartagóð að hetjan "sendi" eitthvað mjög pent sms á mann sem myndi hvort sem var nákvæmlega geta sér til um aðstæðurnar.

Ekki var Sandra sátt með þetta... Og við stökkvum fram í tíma. Það er að morgni 2. janúar og nokkrar úr hópnum mættar ELD hressar klukkan átta í vörutalningu í Byggt og búið, í þágu málstaðarins. Klukkan tíu skreppum við Eva María í Hagkaup að kaupa þynnkubjargvætti (fórum hamförum í talningu þrátt fyrir þynnku svo það komi fram). Við kassann eru þessi venjulegu flennifyrirsagnatímarit. "LOGI OG SVANHILDUR ÓLÉTT." Á Evu Maríu kemur mjög undarlegur svipur. Eftir smástund er Anna Pála búin að átta sig á að ekki er allt með felldu en Eva ber við minnistapi um atburði næturinnar. Hringt er í Söndru. 

A: SANDRA ÓSK! 

S: uuujá?

A: SENDIR ÞÚ SMS Á LOGA BERGMANN ÚR SÍMANUM MÍNUM Í NÓTT?

S: uuu... Já?

A: HVAÐ STÓÐ Í ÞVÍ?!

S: Það stóð: "Ég get ekki hætt að hugsa um þig."

A: #$!&!!!

Þetta þótti Önnu Pálu alveg sérlega ófyndið á þeim tíma í ljósi fyrrgreindrar óléttu. Nú voru tveir slæmir kostir í stöðunni, þar sem Anna Pála stendur fyrir neðan rúllustigann í Kringlunni að morgni annars janúar með lófann yfir augunum.

a) Senda annað sms og biðjast afsökunar = Líta út fyrir að vera orðin þunn og með móral.

b) Gera ekkert og þykjast hafa sent í rangt númer (eeeeinmitt).

Anna Pála velur fyrri kostinn. Anna Pála mætir í upptöku á Meistaranum þremur vikum seinna, eins og kúkur, en þó farin að hafa nettan húmor fyrir atvikinu. Logi hefur mikinn húmor fyrir atvikinu. Sagan búin.

 

Vonandi skemmtiði ykkur vel

Óska öllum þeim sem nú eru á Hróarskeldu eða á leiðinni, hjartanlega til hamingju og vona að þeir njóti vel. Það væri broddur í þessu ef ég væri ekki á leiðinni í heimsreisu, því ég hef aldrei farið á Roskilde og það er skandall. Mig langar með.

Hróarskelduhátíðin hefst í dag

Urrg

Rétt upp hend sem þolið ekki að vera kölluð vinan/vinur af fólki sem þið þekkið ekki. Sérstaklega í vinnunni. Hef þó grun um að jafnoft og því er vísvitandi beitt til að minnka mann sé það mjög vel meint.

Þegar ég nota þetta orð, segi t.d. "Takk vinur," þá er það einfaldlega af því ég lít á viðkomandi sem vin minn. 

Flutningar og söknuður

Hér í Hvíta húsinu standa flutningar fyrir dyrum og sumir eru fluttir nú þegar. Stefnan er tekin út í móa -Hádegismóa. Austursalurinn svokallaði þar sem menningin, innblaðið, sunnudagsblaðið o.fl. er staðsett, er orðinn að eyðimörk þar sem bara viðskiptin eru eftir. Bílfarmar af skrifborðum að hverfa og kassar úti um allt. Á föstudaginn flyt ég og mæti til vinnu í móanum á mánudag. 

Ég ætla að reyna að vera ekki of neikvæð þrátt fyrir að fjarlægðir aukist til muna hjá mér og þá staðreynd að engin Kringla (ergo ekkert Hagkaup, Kaffitár, önnur kaffihús, Stjörnutorg þegar mötuneytið heillar ekki)  er nálægt. Nýja húsnæðið mun vera mjög skemmtilegt og miklu opnara en núverandi aðstaða. Kringluleysið getur hugsanlega leitt til að við verðum duglegri að borða saman.

 

Söknuðurinn sem nú ríkir í mínum heimi er ekki vegna flutninga, heldur einhvers sem skiptir margfalt meira máli. Í gær dó hann Þórir afi minn. Hann var orðinn veikur og þreyttur en það er jafn sárt og erfitt að kveðja hann fyrir það. Þar að auki eru pabbi, mamma og örverpið Sunna Mjöll á Krít þar til á mánudaginn og mörg fleiri börn og barnabörn afa eru erlendis. Við sem erum heima hittumst öll í gær og kvöddum afa. Ég velti því upp hvað afi væri að gera á himnum ef hann fengi að ráða og við vorum sammála um að hann væri trúlega að veiða, hnýta flugur eða tefla. Með allt heimsins neftóbak til umráða. Og glottir út í annað yfir umstanginu í kringum sig. 

Einstök ályktunarhæfni og ekkert vesen

Þarf bara að láta vita að neðangreind ágiskun var rétt hjá mér. Enda urðu allir skipuleggjendur eins og kúkar þegar ég auglýsti þessa hugmynd yfir ritstjórnina. Björn Ingi var látinn bíða á Stjörnutorgi meðan fólk kom sér yfir á Kringlukrá og svo klæddur í búrkuna að viðstöddum gestum og gangandi. 

Spurning dagsins: Hvernig dettur manni í hug að vera fimm klukkutíma á Kringlukránni?  

Seinna um nóttina var nauðsynlegt að klæðast skóm drekans, A.K.A. búrkunni til að geta tekið rúnt á Ölstofunni, klipið karlmenn í rassinn og tekið skot undir blæjunni. Setningu næturinnar átti líklega Árni. "Hún talar ekki íslensku." Góð redding úr viðreynslu hjá einhverjum sem greinilega fílar að láta koma sér á óvart. 

Skemmtiatriði dagsins átti sér stað í portinu hjá Sirkus. Fólk í jakkafötum og drögtum með frosin bros, undir manni með gjallarhorn sem endurtók aftur og aftur og aftur og aftur: "Hjá okkur er allt í lagi. Ekkert vesen. Þannig viljum við hafa það. Allt í lagi. Ekkert vesen..." Eins og pabbi benti á í miðjum einhverjum orðaflaumi sjálfrar mín um Orkuveituauglýsinguna: "Þetta er ekki auglýsing, þetta er áróður."

Sýning dagsins er svo tvímælalaust kökusýningin hjá Ingunni og vinkonu sem buðu í tertur í gallerí Gyllinhæð á Laugaveginum. Farin að horfa á leikinn í félagsskap Górillufélags. Takk og góða nótt. Gleðilega þjóðhátíð.

Björn Ingi Hrafnsson í búrku

Þjóðarhreyfingin með bjór ætlar að funda á Kringlukránni um það bil núna. Svo ég má ekki vera að þessu. Í hreyfingunni eru blaðamenn Morgunblaðsins. Sérstakur leynigestur mun stíga á stokk mjög fljótlega. Hann verður klæddur í búrku til að þekkjast ekki.

Ég segi að þetta verði Björn Ingi Hrafnsson, formaður borgarráðs og fyrrum íþrótta- og þingfréttaritari Morgunblaðsins. Þetta er skrifað svo ég geti sagt "Ég sagði það."

Jæja

Einhver gæti haldið því fram þetta blogg sé búið að breytast í aumingjablogg vegna fátíðindanna sl. hálfan mánuð. Svo er ekki.

Dómnefndin þurfti einfaldlega að taka sér mjög góðan tíma til að íhuga það vandasama úrlausnarefni sem upp kom varðandi úrslit málsháttaslagorðakeppninnar.

Niðurstaðan er þessi: Þetta land fer til andskotans ef úrslitin standa. A.m.k aðeins nær. Því hefur verið útnefndur nýr sigurvegari í keppninni.  

Til hamingju Hrund með sigur í keppninni fyrir tillöguna

Æ sér þjór til þynnku.

Jafnframt verður þetta titill bloggsins næstu a.m.k. næstu vikuna samkvæmt reglum keppninnar. Tek fram að sú staðreynd að dagurinn sem leið var þynnkudagur, hefur ekki áhrif þar sem að á sínum tíma var þetta helsti keppinautur þess sem hefur borið titilinn að undanförnu (en var sviptur honum vegna dópneyslu.) 

Úr umsögn dómnefndar: "... Eitthvað sem við öll vitum en mörg okkar horfast sjaldan í augu við... Góð áminning um að stundargaman er kannski innistæðulítið þegar það eyðileggur jafnmikið og það gefur okkur... Þó mætti líta á þetta sem æðrulausa nálgun á það sem einfaldlega tilheyrir því að vera ungur í hjarta, vitlaus og lifa lífinu."

Skál fyrir Hrund. 

 

P.s. Bjarnið biður mig um að koma á framfæri við lesendur að kallinn minn sé bestur.

SKANDALL (langþráð úrslit í málsháttakeppninni)

Ef ég væri stjórnmálaflokkur væri mér á engan hátt treystandi fyrir völdum. Ég myndi svíkja öll kosningaloforð. Hér má skjóta inn að ég var einmitt í gærkvöldi að ræða um að stofna einhvern tímann sérframboðið "Sameinaðir vinstrimenn."

En allavega. Eins og glöggir lesendur hafa eflaust tekið eftir er löngu komið að skuldadögum: Ég lofaði að birta úrslit í málshátta-slagorðakeppninni fyrir meira en viku síðan. Hér birtast úrslitin. Fyrst verðlaun í aukaflokkum, sbr. 4.gr. keppnisreglna. Vinningstillögur eru merktar með rauðum lit en læt aðra góða fylgja með í flestum flokkum.

 

Bitri gaurinn:

-Betra er vín en ástaratlot þín (Henrý Þór)

 

Úr umsögn dómefndar: "... Ber vott um vott af sjálfseyðingarhvöt...  En hver hefur svosem ekki verið fullur, bitur og melankólískur." 

 

 

Stúdentalífið:

-Betra er að fara í leiðinlegt hóf en leiðinlegt próf (Dagga)

-Betra er grænt eyra á kodda en prófatíð í Odda (Eva Bjarna)

-Betri er brestur í skógi en athyglisbrestur (Fannita Dorada)

Úr umsögn dómnefndar: "... Sérstök, ungæðisleg og kaldhæðin sýn á próftíð sem felur í sér jákvæð skilaboð ef vel er að gáð... Höfðar til breiðs hóps notenda íslenska tungumálsins sem flestir hafa tekið próf á ævinni. "

 

Lögfræði:

-Betra er að jafna lög en lögjafna (Valdi)

-Betri er firring en fyrning (Laufey)

Úr umsögn dómefndar: "... Fer beint að kjarna þess sem lögfræði skyldi snúast um og löggjafinn ávallt hafa í huga... Hugsar í lausnum, ekki vandamálum..."

 

Bjarnaflokkur

-Betra er jó en skó (?) (Bjarni Már)

Úr umsögn dómefndar: "."

 

Kynlíf:

-Skárri er lús í höfði en í klofi (Eyrún)

-Hlustaðu ef Nei segir mey (Rabbarinn)

Úr umsögn dómnefndar: "Ljóðræn og hreinskilnisleg nálgun á eitthvað sem við öll glímum við í hversdagsleikanum." 

 

Sérstök aukaverðlaun dómnefndar: Egóbústið

-Góð er Anna Pála er kemur til háttarmála. (Villi Ásgeirsson)

Úr umsögn dómefndar: "... Því má komast að þeirri niðurstöðu að Villi sé vissulega allt sem þarf." 

 

Og hér höfum við annan aðalflokkinn í keppninni:

Kosningaslagorð:

-Þekking er blekking - álver allstaðar (Jóhann Friðriksson)

-Sjaldan verður maður staur-blindur nema fullur sé  (X-D Árborg) (Sigurður Gröndal)

-Betri eru ellismellir en Skerjavellir. –XF (Stígur) (Einnig: Aukaverðlaun í flokki kosningamálshátta)

-Þjóðarsátt um lækningu við fötlun! (Henrý Þór)

-Við vinstra brjóst fjallkonunnar, slær hjartað! (Arnór Snæbjörnsson)

 

Úr umsögn dómnefndar: "... #%$!"

Og hér fer að koma að því. Hinn aðalflokkurinn var einfaldlega málshættir.

Klassíkerar framtíðarinnar:

-Hóf er best í hófi (Villi Reyr)

-Betri er koss að morgni en ást úti á horni (Villi Ásgeirsson)

-Betri er Skafís á diski, en hafís á veðurkorti. (Grétar –Einnig viðurkenning í aukaflokknum “Sértækasti málshátturinn”)

-Betri er kúkur í klósti, en í pósti (Sindri)

-Sjaldan er ein bólan stök (Vigga)

-Betra er að vera fullur af kampavíni en fullur af einhverju öðru (Ást og hamingja)

-Æ sér þjór til þynnku (Hrund) (Aukaverðlaun í flokknum)

-Betri er góður blundur en leiðinlegur fundur (Eiður Ragnarsson)

Úr umsögn dómnefndar: "Brillíant útúrsnúningur á einhverju sem við heyrum alltof oft... Heimspekilegt sjónarhorn á boð og bönn sem við setjum okkur... Býður upp á skemmtilega túlkunarmöguleika vegna mismunandi merkingar orðsins hóf... Uppreisn gegn höftum ofsiðaðs samfélags... Vinnur á í einfaldleika sínum... Bravó."

 

SIGURVEGARI KEPPNINNAR: 

Vilhjálmur Reyr Þórhallsson, fyrir málsháttinn

Hóf er best í hófi.

Dómnefndin hafði raunar nokkrar áhyggjur af því að hann væri ekki frumsaminn en hann finnst hins vegar ekki við gúglun eins og margar aðrar góðar tilraunir í keppninni. Til hamingju með þetta! Megum við tileinka okkur þennan málshátt og lifa eftir honum. Eins og heitið var, verður titli bloggsins breytt a.m.k. næstu vikuna og hugsanlega lengur vegna óhóflegs dráttar í störfum dómnefndar.

Takið þátt í keppninni, skækjur! - "Sjaldan er ein bólan stök" - "Þekking er blekking - álver alls staðar"

Nú þegar má telja innlegg í málshátta- og slagorðakeppnina miklu, í hundruðum og keppendur í tugum. 

Ritstjórnin hefur nokkrar áhyggjur af hlut kvenna í keppninni en hyggst þó ekki setja kynjakvóta á þátttöku, heldur treystir því að kvenkynið sé enn að hugsa málið og komi með ódauðlegar tillögur áður en skilafrestur rennur út, kl átjánhundruð annað kvöld.

Dómnefnd keppninnar hefur svo af því nokkrar áhyggjur að vegna bágborins andlegs og líkamlegs ástands / anna við að fagna próflokum á morgun, geti það tafist eitthvað að tilkynna úrslitin og gerir hér um það fyrirvara. Enda mikið verk fyrir höndum.

Annars hafa fæstir keppendanna nýtt sér færi á að endurtitla þetta blogg, sbr. 6.gr. keppnisreglna, vek athygli á henni.

Tillögur skilast eftir sem áður í kommentakerfið við síðustu færslu og er stefnan sett á metfjölda kommenta á þessum bloggvef. Lifið heil