Víst viltu lesa um breytingar á skattkerfinu

Ég er hress með að heyra að ASÍ og ríkisstjórnin hafi náð samkomulagi.

Í fyrsta lagi eru breytingarnar skref í rétta átt með skattkerfið að mínu mati (og Guðna Ágústssonar skv kvöldfréttum RÚV). Skattleysismörkin voru komin út úr kortinu og því engan veginn réttlætanlegt að lækka tekjuskattsprósentuna áður en þau voru hækkuð. Aldursmörk barnabóta eru færð úr 16 í 18 ár, sem speglar raunveruleikann mun betur. Og vaxtabæturnar sem menn tókust svo heiftarlega á um í þinglok, verða leiðréttar. Manni dettur bara í hug gamli skólasöngur MH-inga: "... Að byggja réttlátt þjóðfélag!"

Í öðru lagi vona ég að þetta þýði að kjarasamningar náist og böndum verði komið á verðbólguna. Ég vil endilega ekki að krónan haldi áfram að veikjast og fyrirsjáanlegur framfærslukostnaður okkar Barböru í haust, haldi áfram að hækka í íslenskum krónum talið. Maður vill nú ekki borga sextíukall fyrir máltíð sem gæti kostað fimmtíu krónur.

Spennandi verður að sjá hvort Geir heldur fast við sinn keip með að lækka tekjuskattinn um a.m.k. eitt prósent. Ekki til þess fallið að slá á verðbólguna en það er svona þegar menn lofa stórt. Mér fannst athyglisvert það sem hann sagði í fréttunum, eitthvað á þá leið að ríkisstjórnin VÆRI að standa við skattalækkunarloforð því sömu fjárhæðir færu í þessar breytingar og þær sem stóðu til. Ekki beinlínis það sem flestir höfðu séð fyrir sér held ég. Er það kannski bara rétt eftir allt að Sjálfstæðisflokkurinn sé stærsti jafnaðarmannaflokkur Norðurlandanna?

Samkomulagi náð um kjarasamninga

Á leið í heimsreisu

Þá er það opinbert. Fyrir svona hálftíma síðan, finnst mér a.m.k., ákvað hún Barbara snillíngur að bjóða mér í heimsreisu. Kortéri seinna var ég búin að segja já, en ekki hvað. Síðan þá hef ég gengið um í Teletubbies stemmningu og hlakka alveg ofsalega til. Löngu kominn tími á mig. Ég klára svo skólann á vorönn. Sé þann möguleika í stöðunni að geta þá jafnvel setið á rassinum í meira en fimm mínútur í einu og einbeitt mér að námi. Það væri tilbreyting. 

Ferðaplanið er á teikniborðinu núna, eins og Ísland. Sem stendur er líklegast að við byrjum í Suður-Afríku eða jafnvel Bombay. Og þaðan út um allt. Fyrst verður flogið til London og þaðan eigum við fimmtán flugferðir sem nú er verið að púsla saman. Hún Anna nafna mín á Ferðaskrifstofu Íslands situr sveitt við að uppfylla óskir okkar, almættið veri með henni.

Einhvern tímann var Barbara maður dagsins á þessu bloggi. Ætli hún verði ekki gerð að heiðursmanni næstu mánaða núna. Ég efast ekki um að við verðum magnaðir ferðafélagar og munum rata í endalaus ævintýri. Sem er gott. Mjög gott. Það er ekki öllum gefið að vera traustsins verðir og um leið ávísun á endalaust stuð, en Barbara stendur undir þessu og gott betur. 

Þess má geta að af einhverjum ástæðum get ég ekki linkað á hana, en bloggið hennar Barböru ásamt sérlega fallegri lýsingu á mér (varð bara hlýtt í hjartanu) er að finna hér: www.barbara.blog.is  

Versta byrjun á deginum

Djöfull hata ég að sofa yfir mig.

Eftir hádegi var mér náðarsamlega tjáð að það væri ennþá skrifað á ennið á mér "Yfirsof." Eftir að hafa vaknað með andfælum í morgun, einum og hálfum tíma seinna en áætlanir stóðu til, er ég varla ennþá búin að jafna mig. Dagurinn byrjar einhvern veginn aldrei.

Hann varð samt ágætur hingað til. Gærkvöldið var sérlega skemmtilegt, fyrri hlutinn á Pressukvöldi um blaðamenn og skoðanir þeirra. Þurfti reyndar að fara þegar umræður voru að komast á flug, til mikilvægs fundar við vissar tilvonandi þungaviktarkonur í þessu samfélagi.

Móður- og föðurleysinginn

Þakka öllum sem tóku þátt í gær og þið hin munið að þið eruð fasistar og feðraveldi. 

Annars er hún Helena móðir mín, ásamt Sverri föður mínum og örverpinu Sunnu Mjöll komin til Krítar í dag, með um þriggja daga fyrirvara. Ég er ekki viss um hvenær þau koma aftur. Kvöldið fyrir brottför uppgötvaði mamma annars vegar að passinn hennar gilti til 21. júlí 2005. Því mátti redda, tjáði mjög rólegur maður henni í símann, augljóslega vanur í áfallahjálpinni. 

Það sem verra er að í fyrrakvöld uppgötvaðist einnig að þau áttu bókað hótel í tvær vikur en flug til baka eftir viku. Sverrir sagði að hann kæmi sko ekki til baka eftir viku. Laxfoss kæmi þarna við í nóvember.

Spurning að við Bjarnið göngum Herkúlesi í foreldrastað þegar HM fóstran segir upp. 

Öll í bleiku í dag - "Atkvæði eigum við í hrönnum"

Í dag er 19. júní og við minnumst þess þegar konur fengu kosningarétt. Í tilefni dagsins ætlum við að sýna að við styðjum jafnrétti í verki og öll klæðast bleiku, bera eitthvað bleikt eða gera eitthvað bleikt. Hlakka mjög til að sjá hvaða útfærslu Moggafólk hefur kosið, eftir áminningu í tíma frá sjálfri mér á föstudaginn sem innihélt m.a. að þeir sem ekki tækju þátt væru fasistar og feðraveldi (og að þessi brandari væri í boði Baugs). 

Einhverjir hafa nefnt að notkun bleika litarins sé arfavitlaus og eingöngu til þess að negla niður staðalímyndir. Réttmæt athugasemd en að mínu viti er ástæðan á þessa leið: Femínismi snýst um frelsi kvenna, ekki bara réttinn til að verða nákvæmlega eins og karlar. Leiðin í átt til virðingar fyrir því sem kvenlegt er felst í að við berum jafnmikla virðingu fyrir því og karlamenningu. Þess vegna upphefjum við bleika litinn. 

Ég kann ekki að fagna deginum á þessu bloggi betur en með eftirfarandi, sem raunar var samið fyrir annan góðan dag. Það er rosalega gaman að kunna þennan texta við góð tækifæri. Sem minnir mig á að í nótt "kom á daginn" að Steindór kann textann við "Girls just wanna have fun" betur en ég.

ÁFRAM STELPUR!!!

Í augnsýn er nú frelsi,
þó fyrr það mætti vera
nú fylkja konur liði
og frelsismerki bera
stundin er runnin upp
Tökumst allar hönd í hönd
og höldum fast á málum
þó ýmsir vilji aftur á bak
en aðrir standa í stað,
tökum við aldrei undir það

En þori ég vil ég get ég?
Já ég þori, get og vil.
En þori ég vil ég get ég?
Já ég þori get og vil.

Seinna börnin segja
sko mömmu hún hreinsaði til
og seinna börnin segja
þetta er einmitt sú veröld sem ég vil
En þori ég, vil ég, get ég?
já ég þori, get og vil!
en þori ég, vil ég get ég?
já ég þori, get og vil!

Áfram stelpur standa á fætur
slítum allar gamlar rætur
þúsund ára kvennakúgunar.
Ef einstaklingurinn er virkur
verður fjöldinn okkar styrkur
og við gerum breytingar.
Atkvæði eigum við í hrönnum
komum pólitíkinni í lag
sköpum jafnrétti og bræðralag.

Áfram stelpur, hér er höndin
hnýtum saman vinaböndin
verum ekki deigar dansinn í.
Byggjum nýjan heim með höndum
hraustra kvenna í öllum löndum
látum enga linku vera í því.
Börnin eignast alla okkar reynslu,
sýnum með eigin einingu,
aflið í fjöldasamstöðu.

Stelpur horfið ögn til baka
á allt sem hefur konur þjakað
stelpur horfið bálreiðar um öxl.
Ef baráttu að baki áttu
berðu höfuð hátt og láttu
efann hverfa 'unnist hefur margt.
Þó er mörgu ekki svarað enn:
því ekki er jafnréttið mikið í raun,
hvenær verða allir menn taldir menn
með sömu störf og líka sömu laun?

Í augsýn er nú frelsi,
og fyrr það mátti vera,
ný fylkja konur liði
og frelsismerki bera.
Stundin er runnin upp.
Tökumst allar hönd í hönd
og höldum fast á málum
þó ýmsir vilji aftur á bak
en aðrir standa í stað,
tökum við aldrei undir það.

En þori ég vil ég get ég?
Já ég þori, get og vil.
En þori ég vil ég get ég?
Já ég þori get og vil.

Einstök ályktunarhæfni og ekkert vesen

Þarf bara að láta vita að neðangreind ágiskun var rétt hjá mér. Enda urðu allir skipuleggjendur eins og kúkar þegar ég auglýsti þessa hugmynd yfir ritstjórnina. Björn Ingi var látinn bíða á Stjörnutorgi meðan fólk kom sér yfir á Kringlukrá og svo klæddur í búrkuna að viðstöddum gestum og gangandi. 

Spurning dagsins: Hvernig dettur manni í hug að vera fimm klukkutíma á Kringlukránni?  

Seinna um nóttina var nauðsynlegt að klæðast skóm drekans, A.K.A. búrkunni til að geta tekið rúnt á Ölstofunni, klipið karlmenn í rassinn og tekið skot undir blæjunni. Setningu næturinnar átti líklega Árni. "Hún talar ekki íslensku." Góð redding úr viðreynslu hjá einhverjum sem greinilega fílar að láta koma sér á óvart. 

Skemmtiatriði dagsins átti sér stað í portinu hjá Sirkus. Fólk í jakkafötum og drögtum með frosin bros, undir manni með gjallarhorn sem endurtók aftur og aftur og aftur og aftur: "Hjá okkur er allt í lagi. Ekkert vesen. Þannig viljum við hafa það. Allt í lagi. Ekkert vesen..." Eins og pabbi benti á í miðjum einhverjum orðaflaumi sjálfrar mín um Orkuveituauglýsinguna: "Þetta er ekki auglýsing, þetta er áróður."

Sýning dagsins er svo tvímælalaust kökusýningin hjá Ingunni og vinkonu sem buðu í tertur í gallerí Gyllinhæð á Laugaveginum. Farin að horfa á leikinn í félagsskap Górillufélags. Takk og góða nótt. Gleðilega þjóðhátíð.

Björn Ingi Hrafnsson í búrku

Þjóðarhreyfingin með bjór ætlar að funda á Kringlukránni um það bil núna. Svo ég má ekki vera að þessu. Í hreyfingunni eru blaðamenn Morgunblaðsins. Sérstakur leynigestur mun stíga á stokk mjög fljótlega. Hann verður klæddur í búrku til að þekkjast ekki.

Ég segi að þetta verði Björn Ingi Hrafnsson, formaður borgarráðs og fyrrum íþrótta- og þingfréttaritari Morgunblaðsins. Þetta er skrifað svo ég geti sagt "Ég sagði það."

Sætasta stelpan

Ég er ekki frá því að Siggi Pálmi hafi bjargað deginum í gær með því að spyrja Geir á blaðamannafundi í utanríkisráðuneytinu, hvort Valgerður væri sætasta stelpan.

Þetta gerðist eftir að Geir hafði farið fram á að kyssa Valgerði í staðinn fyrir að taka í spaðann. Hann lét ekki annað í ljós en að hafa húmor fyrir þessu kommenti kallinn. Þess má geta að Geir er vel giftur. Get staðfest það eftir tveggja ára samstarf í Háskólaráði.

Á hraðferð upp metorðastigann

Ég fæ mína eigin skrifstofu í næstu viku.

Hlustiði hraðar

Ef ég hugsaði jafn hratt og ég tala væri ég mjög langt komin í lífinu.